मतदाताको रोजाइमा पर्नेछुः पोख्रेल

राज्य-राजनीति

गृहपृष्ठ
राज्य-राजनीति

मतदाताको रोजाइमा पर्नेछुः पोख्रेल

ग्लोबल संवाददाता मंगलबार, कात्तिक २९, २०७९

काठमाडौ । काठमाडौं क्षेत्र नम्बर ७ बाट प्रतिनिधिसभा सदस्य उम्मेदवार आकर्षण पोख्रेलले स्वतन्त्र उम्मेदवारहरुका एजेन्डा र सक्रियताप्रति मतदाताहरु पनि आकर्षित भएको आफूले पाएको दाबी गर्नुभएको छ । उहाँले आज एक विज्ञप्ति जारी गर्दै आफू हाम्रो नेपाली पार्टी र लौरो चिन्ह अभियानबाट उम्मेदवार रहेको स्पष्ट पार्नुभएको छ ।

उहाँले आफू विजयी हुने दाबी गर्दै भन्नुभयो, “स्थानीय तहको निर्वाचनमा सुरु भएको परिवर्तन खोज्ने अभियानले नै आसन्न निर्वाचनमा पनि निरन्तरता पाउनेमा विश्वास छ ।” उहाँले विगतमा वैकल्पिक दलहरु शक्ति आर्जनमा लाग्दा स्थापित हुन नसकेको बताउनुभयो ।

“पदमा पुगेपछि मात्र परिवर्तन हुन्छ भन्ने मान्यताबाट अघि बढ्दा समस्या भएको हो”, जारी विज्ञप्तिमा भनिएको छ, “परिवर्तनका लागि पद चाहिन्छ भन्ने छैन । नेताहरुले नीति बनाउने र नीति कार्यान्वयन भए विकास हुने उहाँको भनाइ छ । फलानोले जित्यो भने विकास हुन्छ भन्ने मानसिकता हटाउनुपर्छ ।”

उहाँले आफू कुनै अमुक दलको उम्मेदवार भएको भनि गरिएको प्रचारको खण्डन गर्नुभएको छ । वर्तमान निर्वाचन प्रणालीका कारण पनि सक्षम उम्मेदवार आउन कठिन भएको दाबी गर्दै चुनाव खर्चिलो भएको बताउनुभयो । “हामी गलत अभ्यासमा गइरहेका छौँ, वर्तमान निर्वाचन प्रणालीमा सुधारको आवश्यकता छ”, उहाँले भन्नुभयो ।

उहाँले आफू पैसा खर्च गरेर राजनीति गर्ने पक्षमा नरहेको स्पष्ट पार्नुभयो । “मैले जानेको कुरा समाजलाई दिन्छु भनेर राजनीतिमा आएको हुँ, यदि मेरो सोच र विचार मिल्छ भने ठीक छ होइन भने म पैसा खर्च गरेर राजनीति गर्ने पक्षमा छैन ।”

प्रकाशित मिति: मंगलबार, कात्तिक २९, २०७९ १६:३६

प्रतिक्रिया दिनुहोस्