घलेभन्ज्याङ । माघे संक्रान्तिको अवसरमा आइतबार पञ्चकन्या गाउँपालिका-३ को पिपलडाँडासहित नुवाकोटका विभिन्न ठाउँमा गरी ३७ हल गोरु जुधाइएको छ । पञ्चकन्यामा स्थानीय युवा समूहले गरेको आठौं बृहत् गोरु जुधाइ मेला तथा सांस्कृतिक कार्यक्रममा ९ हल गोरु जुधाइएको कार्यक्रम संयोजक गुरुबहादुर थापाले जानकारी दिनुभयो ।
उहाँका अनुसार झलकबहादुर थापाको गोरखाबाट ल्याएको रातो दार्मे गोरु पहिलो भएको छ भने सोही गोरुसँग जुध्ने जीवन थापाको कालो दार्मे गोरु दोस्रो भएको छ । यस्तै स्थानीय रमेश पराजुलीको प्वालें गोरु तेस्रो भएको संयोजक थापाले जनाउनुभयो ।
पञ्चकन्या गाउँपालिकाका अध्यक्ष तेजबहादुर तामाङको प्रमुख आतिथ्यतामा भएको कार्यक्रममा पहिलो हुने गोरुधनीलाई ५० हजार, दोस्रोलाई ३० हजार र तेस्रोलाई २० हजार रुपैयाँ पुरस्कार दिइएको छ । मेलामा १० हल समावेश भए पनि एक हल गोरु जुधाउन नसकिएको संयोजक थापाले बताउनुभयो ।
कार्यक्रममा उपाध्यक्ष विमला केसी पाठक, वडाध्यक्षहरु, विभिन्न दलका प्रतिनिधिसहित स्थानीयको बाक्लो उपस्थिति थियो । कार्यक्रममा कलाकारहरुले सांगीतिक प्रस्तुति राखेका थिए । त्यसैगरी, नुवाकोट–रसुवा सीमा बेत्रावतीमा ९ हल गोरु जुधाइएको छ ।
यहाँ तिब्बत–चीन–नेपाल युद्धपछि सन्धि गरिएको बेत्रावतीमा स्थानीयले ३ हल गोरु जुधाएर गीर खेल खेलिएको इतिहास रहेकोले गोरु जुधाईलाई निरन्तरता दिएको गोसाइँकुण्ड युवा क्लबले जनाएको छ । तारकेश्वर गाउँपालिका–३ तारुकाको चन्दनीस्थित कटहरबोट पाटोमा हरेक वर्ष माघे संक्रान्ति गोरु जुधाई मेला महोत्सव आयोजना गरेर गोरु जुधाइने गरिएको छ ।
यहाँ आइतबार १९ हल गोरु जुधाइएको स्थानीय समाजसेवी केशवप्रसाद रिमालले जानकारी दिनुभयो । उहाँले सोमबार ९ हल गोरु जुधाइने बताउनुभयो । गोरु जुधाई महोत्सवमा खैँचडीभजन, लोकदोहोरी, पन्चेबाजासहित नाचगान गरिएको छ ।
तत्कालीन बझाङी राजा विक्रमबहादुर सिंहको छोरा जयपृथ्वीबहादुर सिंह नुवाकोटको तारुकास्थित मामाघरमा आएको समयमा विसं १८८७ मा पहिलोपटक गोरु जुधाएर रमाइलो देखाइएको किंबदन्तीको आधारमा यहाँ हरेक वर्ष गोरु जुधाई परम्परालाई निरन्तरता दिइएको छ ।
