काठमाडौं । नेकपा माओवादी केन्द्रका सांसद हितबहादुर तामाङले शिवपुरी नागर्जुन राष्ट्रिय निकुञ्जबाट प्रभावित किसानहरुलाई क्षतिपूर्ति दिन अर्थ मन्त्रालयले ढिलाइ गरेको भन्दै प्रतिनिधिसभामा आवाज उठाउनु भएको छ ।
संसद्को आइतबारको बैठकमा सांसद तामाङले शिवपुरी निकुञ्जका मध्यवर्ती क्षेत्रका किसानहरुको बाली जंगली जनावरले सखाप पारेको र घर पालुवा जनावरसमेत क्षति गराएपछि क्षतिपूर्तिका लागि फाइल अर्थ मन्त्रालयमा पुगे पनि सम्बोधन नभएको विषय उठाउनु भएको हो । उहाँले प्रभावित किसानलाई तत्काल क्षतिपूर्तिबापत रकम उपलब्ध गराउन अर्थको ध्यानाकर्षण गराउनुभयो ।
'शिवपुरी नागर्जुन राष्ट्रिय निकुञ्जबाट प्रभावित जिल्लाहरु नुवाकोट, सिन्धुपाल्चोक, धादिङ, काठमाडौं जिल्लाका मध्यवर्ती क्षेत्रका किसानहरुका बाली बाँदर, बदेलले क्षति पुर्याएको छ । त्यसको क्षतिपूर्तिका लागि र त्यसबाहेक चितुवालगायत हिंस्रक जनावरले घरपालुवा जनवारलाई पुर्याएको क्षतिपूर्तिका लागि त्यहाँका किसानहरुले फाइल अर्थ मन्त्रालयमा पुर्याएको महिनौं दिन भइसक्यो भन्ने कुरा छ । सम्बन्धितले क्षतिपूर्ति पाएका छैनन्,' उहाँले भन्नुभयो, 'सम्माननीय सभामुखमार्फत अर्थ मन्त्रालयको गम्भीर ध्यानाकर्षण गराउन चाहन्छु ।'
सांसद बिजुला रायमाझीले जनताका मागका सन्दर्भमा उठाइएका विषयलाई सम्बोधन गर्न माग गर्नुभयो । सांसद बिना लामाले मिटरब्याजपीडितको समस्या समाधान हुन नसकेको भन्दै उहाँले सरकारको ध्यानाकर्षण गर्नुभयो । उहाँले दुग्ध किसानको माग सम्बोधन गरी उनीहरुले बिक्री गरेको दूधको पैसा भुक्तानी गर्नुपर्ने बताउनुभयो ।
सांसद विद्या भट्टराईले कास्कीका अधिकांश सहकारी समस्यामा परेको, सूर्यदर्शन सहकारीपीडितहरु सबैभन्दा बढी मारमा परेको भन्दै दोषीलाई कारबाहीको दायरामा ल्याउन माग गर्नुभयो । “पोखरा महानगरमा तीन सय ६७ वटा सहकारी छन् । त्यसमध्ये १६ वटा सहकारी संस्थाको बचत जोखिममा रहेको छ । सहकारी क्षेत्र सुधार सुझाव कार्यदलले दिएको सुझाव कार्यान्वयन आवश्यक छ”, उहाँले भन्नुभयो ।
सांसद विनिताकुमारी सिंहले मधेस प्रदेशमा साक्षरता दरमा सबैभन्दा पछाडि परेको, अनुगमनमा ध्यान नदिइएको, शिक्षामा लगानी कम भएकाले अपेक्षित प्रगति हुन नसकेको धारणा राख्नुभयो ।
सांसद विराजभक्त श्रेष्ठले श्रमजीवी पत्रकारले तोकिएको पारिश्रमिक पाउन नसकेको विषय सञ्चारमाध्यमदेखि सडकसम्म पुगेको उल्लेख गर्दै पत्रकार विषम परिस्थितिमा पुगेको बताउनुभयो । सांसद श्यामकुमार घिमिरेले कमला नदीका कारण सिन्धुलीलगायतका जिल्ला नराम्ररी प्रभावित भए पनि नदी नियन्त्रणका लागि यथेष्ट बजेट विनियोजन हुन नसक्दा काम हुन नसकेको बताउनुभयो ।
सांसद सन्तोष परियारले सामुदायिक शिक्षाको विकास र विस्तारका लागि महत्वपूर्ण मानिएको भक्तपुरको ख्वप कलेजलाई विश्वविद्यालय बनाउने विधेयक ल्याउन सरकारको ध्यानाकर्षण गराउनुभयो । सांसद हितराज पाण्डेले संसद् बैठकको प्रत्यक्ष प्रसारण हुने भएकाले जनताले सांसदको भूमिका, जिम्मेवारी स्पष्टसँग देखेको उल्लेख गर्दै उत्तरी गोरखाको विकास निर्माणबारे सरकारको ध्यानाष्र्काण गराउनुभयो ।
सांसद ज्ञानेन्द्रबहादुर कार्कीले पूर्वी नेपालमा किसानलाई बाँदरले ठूलो दुःख दिएकाले समस्या समाधान गर्न सरकारको ध्यानाकर्षण गराउनुभयो । सांसदहरु शान्ति विक, शिव नेपाली, शिशिर खनाल, शोभा ज्ञवाली, सन्तोष चालिसे, सराज अहमद फारुकी, सरिता भुसाल, स्वर्णीम वाग्ले, शान्ति चौधरी, सीताकुमारी राना, सीता मिजार, सुनिता बराल, सुमना श्रेष्ठ, सुशीला श्रेष्ठ, सूर्यकुमारी श्रेष्ठ, सूर्यमान दोङ, हितबहादुर तामाङ, हेमराज राई, हृदयराम थानी, ज्ञानु बस्नेत सुवेदीले समसामयिक विषयमा सरकारको ध्यानाकर्षण गराउनुभयो ।
