तेमालको उग्येन पेज्यूङ डुब्देलिङ गुम्बामा शनिबार दोर्जेफुर्वा वाङ तथा अभिषेक कार्यक्रम

कृषि-पर्यटन

गृहपृष्ठ
कृषि-पर्यटन

तेमालको उग्येन पेज्यूङ डुब्देलिङ गुम्बामा शनिबार दोर्जेफुर्वा वाङ तथा अभिषेक कार्यक्रम

ग्लोबल संवाददाता बुधबार, चैत ७, २०८०

काभ्रेपलाञ्चोक । तामाङ समुदायको ऐतिहासिकस्थल काभ्रेपलाञ्चोकको तेमाल गाउँपालिका ८ टेकानपुरमा निर्मित उग्येन पेज्यूङ डुब्देलिङ गुम्बामा शनिबार दोर्जेफुर्वा वाङ (ब्रजकिलय) तथा अभिषेक कार्यक्रम हुँदैछ ।

डा. खर्चेन टुल्कु वाङचुक रिग्जिन रिन्पोछेबाट दोर्जेफुर्वा वाङ तथा अभिषेक कार्यक्रम हुन लागेको आयोजक उग्येन पेज्यूङ डुब्देलिङ गुम्बा व्यवस्थापन समितिका अध्यक्ष जगतमान लामा (दोङ)ले जानकारी दिनुभयो । कार्यक्रममा सहभागी हुन डा. खर्चे टुल्कु वाङचुक बिहीबार बिहान ८ बजे भुटानबाट काठमाडौंमा उत्रिने र पर्सि शुक्रबार चैत ९ गते बिहानै तेमालको यारिनक पुगिने अध्यक्ष लामाले बताउनुभयो । उहाँका अनुसार गुम्बामा शनिबार बिहान १० देखि ११ बजेसम्म पूजापाठ र ११ देखि ३ बजेसम्म वाङ (अभिषेक) प्रदान गर्ने कार्यक्रम छ ।

कार्यक्रम व्यवस्थापनका लागि विभिन्न क्षेत्रका व्यक्तिहरुले सहयोग समेत गरिरहेको अध्यक्ष दोङले जानकारी गराउनुभयो ।

उक्त गुम्बा गत वर्षको आगामी चैत १८ गते तत्कालीन उपप्रधान तथा गृहमन्त्री नारायणकाजी श्रेष्ठले उद्घाटन गर्नुभएको थियो । नेपाल तामाङ घेदुङका महासचिव तथा पत्रकारसमेत रहनुभएका दोङको अगुवाइमा देश, विदेशमा सहयोग संकलन गरी झण्डे डेढ करोड लागतमा गुम्बा निर्माण गरिएको हो । गुम्बा निर्माणका लागि २ रोपनी १५ आना जग्गा दोङकै परिवारले दान गरेको हो ।

२०७७ पुस २० गतेदेखि निर्माण थालिएको गुम्बा करिब २७ महिनामा मूल भवन निर्माण सकिएको थियो ।

काठमाडौंबाट ७५ किलोमिटर दूरीमा रहेको तेमाल तामाङ जातिको आदिमथलो एवं ऐतिहासिक थातथलोको रुपमा परिचित छ । तेमालको गेलोङ ऊमा पद्मसंभव गुरु रिम्पोछेले तपस्या गर्नुभएको थियो ।

प्रकाशित मिति: बुधबार, चैत ७, २०८० २३:४७

प्रतिक्रिया दिनुहोस्