काठमाडौं। सौन्दर्य सेवा तथा व्यावसायिक सीपको क्षेत्रमा काम गर्दै आएको ‘निरू ब्युटी एकेडेमी एन्ड युनिसेक्स सलोन’ ले काठमाडौंको चाबहिलमा आफ्नो चौथो शाखा सञ्चालनमा ल्याएको छ। गोपीकृष्ण हल पछाडि, रिलायन्स कलेज नजिकै रहेको शाखाको सोमबार विशेष समारोहबीच उद्घाटन गरिएको हो।
मम्स नेपालकी अध्यक्ष, मिस तामाङ आयोजक तथा अभिनेत्री रञ्जिता ब्लोनले शाखाको उद्घाटन गर्दै सौन्दर्य व्यवसायलाई व्यावसायिक रूपमा विस्तार गर्दै लैजानु उपलब्धि भएको बताउनुभयो । ‘यो व्यवसाय मात्र होइन, सीप र दक्षता विकाससँग पनि जोडिएको छ,’ उहाँले भन्नुभयो ।
अभिनेत्री चाँदनी मोक्तानले एउटा महिलाले आफ्नै सीप र लगानीमा व्यवसाय सञ्चालन गर्दै अघि बढ्नु सकारात्मक भएको बताउनुभयो । कार्यक्रममा सैलुङ अनलाइन डटकमका अध्यक्ष श्यामलाल लामाले सौन्दर्य सेवा अहिले सबैका लागि आवश्यक बन्दै गएको भन्दै ग्राहकको विश्वास र सन्तुष्टिले नै व्यवसाय विस्तारमा योगदान पुर्याउने बताउनुभयो ।
धादिङको मलेखुबाट २०७० मा सुरु भएको निरू ब्युटी एकेडेमीको सेवा अहिले काठमाडौंका विभिन्न स्थानमा विस्तार भएको छ। यसअघि मलेखु, सामाखुसीको टाउन प्लानिङ र स्वयम्भुस्थित एबीएस कम्प्लेक्समा तीन शाखा सञ्चालनमा थिए। चाबहिल शाखा चौथो शाखाका रूपमा थपिएको हो।
सञ्चालक निरू तामाङले विद्यालय अध्ययनकै समयदेखि सौन्दर्य क्षेत्रमा रुचि रहेको र साथीहरूको प्रेरणाबाट यस क्षेत्रमा प्रवेश गरेको बताउनुभयो । निरन्तरको मेहनत, सीप र ग्राहकको विश्वासलाई आधार बनाएर व्यवसाय विस्तार गर्दै आएको उनको भनाइ छ। सौन्दर्य सेवालाई महिलाको सीप विकास र आत्मनिर्भरतासँग जोड्ने उद्देश्यसमेत रहेको उहाँको भनाई छ ।
प्रदान गरिने सेवाहरु
सौन्दर्य तथा व्यावसायिक सीपको क्षेत्रमा सक्रिय ‘निरू ब्युटी एकेडेमी एन्ड युनिसेक्स सलोन’ ले विभिन्न अवधिका ब्युटिसियन तालिम तथा आधुनिक सौन्दर्य सेवाहरू सञ्चालन गर्दै आएको छ। एकेडेमीले २ महिनाको बेसिक ब्युटिसियन कोर्स, ३ महिनाको एडभान्स ब्युटिसियन कोर्स, ६ महिनाको फुल ब्युटी कोर्स तथा वैदेशिक रोजगारीलाई लक्षित २ महिनाको विशेष कोर्स सञ्चालन गरिरहेको जनाएको छ।
मास्टर नेल क्लासेस र आइल्यास एक्सटेन्सन क्लासेस समेत उपलब्ध छन्। एकेडेमीमा छाला तथा कपाल सम्बन्धी उपचार, नेल तथा आइल्यास सेवा, म्यानिक्योर–पेडिक्योर, सेमी–पर्मानेन्ट मेकअप, ट्याटु हटाउने, पर्मानेन्ट हेयर रिडक्सन, हेयर एक्सटेन्सन तथा ब्राइडल मेकअप लगायतका सेवा प्रदान गरिँदै आएको छ। साथै, ब्राइडल मेकअपसम्बन्धी व्यावसायिक तालिम र छाला तथा पार्लरसँग सम्बन्धित सम्पूर्ण सौन्दर्य सेवा तथा सीपमूलक तालिम समेत उपलब्ध रहेको एकेडेमीले जनाएको छ। चाडपर्वलाई लक्षित गरी सलोनका सबै शाखामा विशेष छुटको व्यवस्था गरिएको छ।
दसैँ, तिहार र छठलाई लक्षित गरी सेवामा २० देखि ४० प्रतिशतसम्म छुट उपलब्ध गराइएको तामाङले जानकारी दिनुभयो । ‘सौन्दर्य सेवा मात्र नभई महिलालाई सीप र आत्मनिर्भरतासँग जोड्ने उद्देश्यले संस्थालाई विस्तार गर्दै आएका छौँ,’ तामाङले भन्नुभयो । आधुनिक प्रविधि, दक्ष जनशक्ति र गुणस्तरीय सेवालाई प्राथमिकता दिएको उहाँको भनाई छ ।
चाबहिल शाखाका सञ्चालक एवं प्रधानाध्यापक चन्द्रमान तामाङले आफूले यस व्यवसायमा सीमित लगानी गरेको जानकारी दिनुभयो । आफू पेसाले प्रधानाध्यापक रहेको उल्लेख गर्दै तामाङले व्यवसायबाट हुने आम्दानीको केही हिस्सा आफ्नो विद्यालयमा अध्ययनरत आर्थिक रूपमा कमजोर अविभावक बिहिन चेपाङ बालबालिकाको सहयोगमा खर्च गर्ने उद्देश्य रहेको बताउनुभयो ।
