कर्णाली,रासस । असोज तेस्रो साता आएको अविरल वर्षापछिको बाढी र पहिराले लामो समयसम्म सडक बन्द हुँदा हिमाली जिल्लाको बजार मूल्य आकाशिएको छ । सडक अवरुद्ध भएको २० दिनपछि मात्र कात्तिक ८ गते मङ्गलबार कर्णाली राजमार्ग खुलेको छ । राजमार्ग त खुलेको छ तर सबै सवारी साधन सहजै आवतजावत हुन सकेका छैनन् । सडकको अवस्था अत्यन्तै जोखिमपूर्ण रहेकाले आवश्यक उपभोग्य समानको आयात सहज बन्न सकेको छैन ।
अवरुद्ध राजमार्गलाई देखाएर मनोमानी तरिकाले बढाइएको उपभोग्य वस्तुको मूल्य व्यापारीले कायमै राख्दा उपभोक्ता मर्कामा परेका छन् । उपभोक्ता चामल, दाल, तेल, चिनी, मैदालगायत वस्तु महँगोमा मूल्य किन्न बाध्य छन् । सडक अवरुद्ध हुनुअघि प्रतिकिलो ७० मा पर्ने मैदा यतिबेला प्रतिकिलो १६० मा बिक्री हुँदै छ । सेल रोटी हाल्नका लागि तिहारको मुखमा प्रतिकिलो १६० हालेर पनि मैदा किन्न नपाइएको जुम्लाको चन्दननाथ नगरपालिका–७ की सम्झना महतले जानकारी दिनुभयो । “खाना पकाउने ग्यासको मूल्य रु तीन हजार पुगेको छ भने खाने तेल प्रतिपोका १६० पु¥याइएको छ”, उहाँले भन्नुभयो, “बजारमा उपभोग्य वस्तु छोइसक्नु अवस्थाका छैनन् । पहिले ५० पर्ने माला अहिले २०० पर्छ ।” मूल्य तेब्बरले बढेको उहाँले बताउनुभयो ।
हिजोका दिनमा खसीको मासु विस्थापित गरेको ब्रोइलर कुखुरा हिमाली जिल्लामा पाउन छोडेको छ । खसीको मूल्य आकाशिँदो छ । ब्रोइलर कुखुराको मासु पाइँदासम्म प्रतिकिलो एक हजारसम्म पर्ने खसीको मासु सडक अवरुद्ध भएसँगै अहिले एक हजार ३०० सम्म पुगेको उपभोक्ता जयशङ्कर धितालले बनाउनुभयो ।
उहाँले भन्नुभयो, “बजारमा सामान अभाव भएर व्यापारी होइन, उपभोक्तालाई ठूलो मर्का परेको छ । व्यापारीले विपद्का कारण अवरुद्ध कर्णाली राजमार्गलाई माध्यम बनाएर रातारात कमाउने अवसर लिइरहेका छन् । बजारमा कृत्रिम अभाव देखाएर कालाबजारी गर्ने व्यापारीलाई स्थानीय प्रशासनले कारबाही गर्नुपर्दछ ।” सवारी साधनमा प्रयोग हुने डिजेल र पेट्रोल अभाव भएको भन्दै गाडी सञ्चालकले रु २०–२५ प्रतिशत भाडा बढाएका छन् ।
प्रतिकिलो ५० पर्ने तरकारी बढेर १०० पुगेको छ । मसलाजन्य सबै वस्तुको मूल्य पनि दोब्बरले बढेको उपभोक्ताले बताएका छन् । यो समस्या कर्णालीका हुम्ला, डोल्पा, मुगु, जुम्लालगायत जिल्लामा बढी छ । जिल्ला प्रशासन कार्यालय जुम्लाका सहायक प्रमुख जिल्ला अधिकारी प्रमिला रिजालले कर्णाली राजमार्ग खुलिसकेकाले अब बजार पहिलेकै अवस्थामा आउने जानकारी दिनुभयो । उहाँका अनुसार भर्खरै गरेको बजार अनुगमन तथा निरीक्षणका क्रममा म्याद गुज्रेका सामान बरामद गरी नष्ट गरिएको बताउनुभयो ।
