रामबहादुर थापा,रासस । भलिबलमा उदाउँदा खेलाडी रवि केसीले टाइगर कपको उपाधि घरेलु टिम गण्डकीलाई दिलाउन योगदान गर्नुभयो र आफू प्रतियोगिताको सर्वोत्कृष्ट खेलाडी घोषित हुनुभयो । केसी खेलाडी हुन् जसले गत पुसमा बङ्गलादेशमा भएको ‘बङ्गबन्धु एसियन यु–२३ सेन्ट्रल एसियन जोन अन्तर्राष्ट्रिय पुरुष भलिबल प्रतियोगिता’मा राष्ट्रिय टिमबाट खेल्नुभएको थियो ।
पोखरामा आयोजित तेस्रो संस्करणको टाइगर कपमा सर्वोत्कृष्ट खेलाडीका रूपमा केसीले रु २५ हजार र ट्रफी हात पार्नुभयो । राष्ट्रियस्तरको प्रतियोगितामा सर्वोत्कृष्ट खेलाडी घोषित हुनुलाई उहाँले खेल जीवनको उपलब्धिका रूपमा लिनुभएको छ । “खुसी छु, मेहनतको फल पाएँ, यसले भलिबलमा अझ राम्रो गर्न प्रेरित गरेको छ”, २२ वर्षीय रविले भने, “दर्शकबाट पाएको माया र हौसलाले पनि उत्साहित छु ।” गण्डकीका टिम प्रशिक्षक रमेश केसीले प्रतियोगिताभर रविले उत्कृष्ट खेल प्रदर्शन गरेको बताउँनुभयो ।
उमेरले जुनियर खेलाडी भए पनि उचाइ र जम्पले केसीलाई साथ दिएको उहाँको भनाइ छ । “विपक्षी खेलाडीभन्दा धेरै माथिबाट रविले स्पाइक गर्न सक्छन्, उनको एडभान्टेज भनेको हाइट र जम्प गर्न सक्ने क्षमता हो ।” “भलिबल टिम वर्क हो, खेल जिताउन सबै खेलाडीको उत्तिकै भूमिका हुन्छ र पनि यसपालि नतिजा निकाल्न रविले उत्कृष्ट योगदान गरे”, प्रशिक्षक केसीले सुनाउँनुभयो।
प्रतियोगिताको अनुभव कम भए पनि रवि प्रतिभावान खेलाडीका रूपमा नेपाली भलिबलमा उदाएको उनको भनाइ छ । बागलुङको गलकोट नगरपालिका–७ मल्ममा जन्मेका रवि छोटो अवधिमै भलिबलमा चम्किनु भएको खेलाडी हो । दुई वर्षअघि काठमाडौंमा भएको ‘एनभिए कप’बाट उनले राष्ट्रियस्तरको प्रतियोगितामा डेब्यु गर्नुभएको थियो ।
गलकोट स्पोर्टस् क्लबबाट रविले उक्त प्रतियोगितामा उत्कृष्ट खेल्दै धेरैको मन जित्नु भएको थियो । तेका थिए । ओपन स्पाइकर रविले पछिल्लो नवौँ राष्ट्रिय खेलकुदमा पनि गण्डकी प्रदेशबाट खेलेका थिए । चौध–पन्ध्र वर्षको उमेरदेखि भलिबल खेल्न सुरु गरेका केसीले अहिलेसम्म कुनै औपचारिक प्रशिक्षण भने लिनु भएको छैन् ।
प्रतियोगिताकाअघि हुने अभ्यासबाहेक नियमित प्रशिक्षण लिने अवसर नपाएको रविले बताउँनुभो । अहिलेसम्म कुनै क्लबमा पनि आबद्ध छैन । व्यावसायिक सुरक्षा र अवसरको सुनिश्चितता भए भलिबलमै समर्पित भएर लाग्ने रविको भनाई छ । खेल कौशलसँगसँगै अनुशासनमा पनि अब्बल मानिन्छन् ।
