प्रतिनिधिसभाः विपक्षीले प्रधानमन्त्रीबाट जवाफ खोजेपछि बैठक स्थगन

राज्य-राजनीति

गृहपृष्ठ
राज्य-राजनीति

प्रतिनिधिसभाः विपक्षीले प्रधानमन्त्रीबाट जवाफ खोजेपछि बैठक स्थगन

ग्लोबल संवाददाता बिहीबार, वैशाख ३१, २०८३

काठमाडौं । प्रतिनिधिसभाको बैठक १५ मिनेटका लागि स्थगन भएको छ । आज बिहान ११ः१५ बजेदेखि जारी बैठकमा आगामी आर्थिक वर्ष २०८३÷८४ को नेपाल सरकारको वार्षिक नीति तथा कार्यक्रममाथि छलफलमा उठेका प्रश्नको जवाफ प्रधानमन्त्री वालेन्द्र शाहले दिनुपर्ने माग गर्दै विपक्षी सांसदहरुले विरोध जनाएपछि सभामुख डोलप्रसाद अर्यालले १५ मिनेटका लागि बैठक स्थगन भएको जानकारी गराउनुभयो ।

प्रमुख प्रतिपक्षी नेपाली कांग्रेससहित विपक्षी दलहरु नेपाल कम्युनिष्ट पार्टी (एमाले), नेपाली कम्युनिष्ट पार्टी (नेकपा), श्रम संस्कृति पार्टी र राष्ट्रिय प्रजातन्त्र पार्टीका सांसदहरुले नीति तथा कार्यक्रममाथिको छलफलमा उठेका प्रश्नको जवाफ दिन प्रधानमन्त्री शाह उपस्थिति हुनुपर्ने माग गर्दै सदनको कामकारबाही अघि नबढाउन सभामुख अर्यालको ध्यानाकर्षण गराउनुभयो ।

नीति तथा कार्यक्रममाथिको छलफलमा उठेका प्रश्नको जवाफ दिन प्रधानमन्त्री शाहले अर्थमन्त्री डा स्वर्णिम वाग्लेलाई तोक्नुभएको व्यहोरासहितको पत्र सदनलाई पठाउनुभएको जानकारी दिँदै सभामुख अर्यालले विपक्षी सांसदहरुलाई आसनमा बसेर सहयोग गर्न आग्रह गर्नुभयो ।

“हामीले छलफल सकेका छौँ, सरकारको तर्फबाट जवाफ दिन अर्थमन्त्रीज्यू तयार हुनुहुन्छ, माननीयज्यूहरु बसेर सहयोग गर्नुहोस्”, सभामुख अर्यालले भन्नुभयो । नेपाली कांग्रेसका प्रमुख सचेतक वासना थापा, एमालेका प्रमुख सचेतक ऐनबहादुर महर, नेपाली कम्युनिष्ट पार्टीका प्रमुख सचेतक युवराज दुलाल, श्रम संस्कृतिका सांसद आरेन राई र राप्रपा संसदीय दलका नेता ज्ञानबहादुर शाहीले सभामुख अर्यालको निर्देशनमा आफूहरुले इमान्दार र अनुशासित भइ नीति कार्यक्रममाथिको छलफलमा भाग लिएको उल्लेख गर्दै जवाफका क्रममा प्रधानमन्त्री शाहको उपस्थिति नभएसम्म सदनको कामकारबाही अघि बढ्न नसक्ने बताउनुभयो ।

प्रकाशित मिति: बिहीबार, वैशाख ३१, २०८३ २०:२८

प्रतिक्रिया दिनुहोस्