ओ पृथ्वीनारायण !

मनोरञ्जन-साहित्य

गृहपृष्ठ
मनोरञ्जन-साहित्य

ओ पृथ्वीनारायण !

राजु स्याङतान मंगलबार, पुस २७, २०७८

सुनकोसी रानीदहमा तैरिरहेको
मेरो म्हे म्हे ह्रिन्जेन दोर्जेको टाउको बोकेर
दुई सय ५८ बर्ष पछि
आज म याम्बुको सडकमा उभिएको छु,
ए पृथ्वीनारायण ! कहाँ लुकेर दिँदैछौ उपदेश ?
सडकमा आउ अन्तिम छिनोफानो गरौँ ।

म मासिन्या मतवाली
गौ हत्याको आरोपमा बेकसुर टुँडिखेलमा काटिएको
मेरो बाजेको टाउको बोकेर
तिम्रो शालिक अघि ठिङग उभिएको छु,
ए जङ्गबहादुर !
कहाँ लुकेर जारी गर्दैछौ उही पुरानो मुलुकी ऐन ?
मैदानमा आउ अन्तिम फैसला गरौँ ।

भिमफेदीको उकालोमा गाडी बोक्दाबोक्दै
रगत छादेर मरेको मेरो पुर्खाको खप्पर बोकेर
तिम्रो चिहान अघि उभिएको छु,
ए जुद्ध शमशेर !
कहाँ लुकेर दिदैछौ आदेश ?
म तिम्रो दरबार बनाउने ज्यामी मात्रै होईन
तिम्रो चिताको दाउरा बोक्ने, मलामी पनि हुँ
मैदानमा आउ, अन्तिम युद्ध लडौँ ।

मैले त केवल, पुर्खाको रगतले भिजेको माटोमा
मेरो नाम मात्र लेखौँ भनेको, तिमीलाई खेद्ने भनेको छैन ।
तिम्रो आँगनमा तुलसीको मठ हुँदा, मेरो आगनमा दर्ज्यु गाडौँ भनेको
तिम्रो घर भत्काउँ भनेको छैन ।
तर तिमीले सुनेनौँ अब छाड्दिन
यो माटोमा लेख्छु आफ्नो नाम आफैंले
आउ मैदानमा आउ !
पुर्खाको अस्थिपञ्जर काँधमा बोकेर
ठिङग उभिएको छु यो मुल सडकमा ।

प्रकाशित मिति: मंगलबार, पुस २७, २०७८ १७:५३

प्रतिक्रिया दिनुहोस्