मतदान प्रक्रिया छिटो थाल्न माग गर्दै घेदुङको महाधिवेशनस्थलमा नाराबाजी

समाज-समावेशी

गृहपृष्ठ
समाज-समावेशी

मतदान प्रक्रिया छिटो थाल्न माग गर्दै घेदुङको महाधिवेशनस्थलमा नाराबाजी

ग्लोबल संवाददाता मंगलबार, चैत १, २०७८

काठमाडौं । मतदान प्रक्रिया छिटो थाल्न माग गर्दै नेपाल तामाङ घेदुङको महाधिवेशनस्थलमा नाराबाजी भएको छ ।
नयाँ नेतृत्व चयनका लागि मतदान प्रक्रियामा ढिलाई गरिएको भन्दै घेदुङको नवौं महाधिवेशन जारी रहेको धुम्बाराहीको एक पार्टी प्यालेसमा मंगलबार अपराह्न नाराबाजी गरिएको हो । नाराबाजी र होहल्ला गर्नेमा अध्यक्षका उम्मेदवार बेली लामा तामाङ, प्रतिनिधि र समर्थनहरु रहेका छन् ।

प्रतिनिधिहरुले राजनीतिक हस्तक्षेप बन्द गर, मतदान प्रक्रिया तुरुन्तै सुरु गरलगायत नारा लगाएका छन् ।
घेदुङको नयाँ नेतृत्वका लागि अध्यक्षमा बेली लामा र निवर्तमान अध्यक्ष मोहन गोले तामाङ प्रतिस्पर्धामा हुनुहुन्छ । २१ पदका लागि ४० भन्दा बढी उम्मेदवार खडा भएका छन् । तीमध्ये वरिष्ठ उपाध्यक्षमा रामकृष्ण ब्लोन, महिला उपाध्यक्षमा सञ्चकुमारी लामा, सीता लामा, महासचिव काजीमान थिङ तामाङ, उपमहासचिव जगमान दोङ, हर्कमान तामाङ, कोषाध्यक्ष रुपबहादुर योञ्जन निर्विरोध भइसक्नु भएको छ ।

बाँकी पदमा सहमति प्रयास भइरहँदा नाराबाजी भएको प्रतिनिधि डीबी तामाङले जानकारी दिनुभयो । घेदुङको महाधिवेशन आइतबारेदेखि सुरु भएको हो । सोमबार दिनभरजसो चलेको बन्दसत्रबाट विधान प्रतिवेदन, आर्थिक प्रतिवेदन पारित भएपछि साँझदेखि निर्वाचन प्रक्रिया थालनी भएको हो ।
नवनिर्वाचित महासचिव काजीमान थिङले अब छिट्टै मतदान प्रक्रिया थालनी हुने बताएका छन् ।

प्रकाशित मिति: मंगलबार, चैत १, २०७८ १७:१६