विश्व किर्तिमानी आरोहीको उपचारका लागि प्रदेश उपसभामुख तामाङको पहल

कृषि-पर्यटन

गृहपृष्ठ
कृषि-पर्यटन

विश्व किर्तिमानी आरोहीको उपचारका लागि प्रदेश उपसभामुख तामाङको पहल

ग्लोबल संवाददाता शनिबार, जेठ २८, २०७९

तस्बिर : ग्लोबल मिडिया

ललितपुर । वाग्मती प्रदेशकी उपसभामुख राधिका तामाङले सबैभन्दा कम उमेरमा विश्वको सर्वोच्च शिखर सगरमाथा आरोहण गरी गिनिज बुकमा नाम लेखाउन सफल क्यान्सरपीडित शम्भू तामाङको उपचारका लागि पहल थाल्नुभएको छ ।

आरोही तामाङको उपचार र राज्यबाट उचित सम्मान उपलब्ध गराउनका लागि वाग्मती प्रदेशको उपसभामुख तामाङको समन्वयमा शनिबार तामाङ रिमठिम पर्यटन संजालका अध्यक्ष अम्बर बम्जन र ट्रेकिङ एजेन्सिज एसोसिएसन अफ नेपाल (टान) का महासचिव सरिता लामासहितको प्रतिनिधिबाट पूर्वप्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डको ध्यानाकर्षण गराइएको हो । आफ्नै निवास खुमलटार ललितपुर पुगेको टोलीसँग अध्यक्ष प्रचण्डले उपचारको व्यवस्था सरकारले गराउन प्रधानमन्त्री शेरबहादुर देउवासँग पहल गर्ने आश्वासन दिनुभएको संजालका अध्यक्ष अम्बर बम्जनले जानकारी दिनुभयो ।

आरोही तामाङ क्यान्सर अस्पताल हरिसिद्धीमा उपचाररत हुनुहुन्छ । सिन्धुपाल्चोकको ह्रिस्याङगोमा जन्मिएका तामाङले सन् १९७३ मे ५ को दिन १७ वर्ष ६ महिना १५ दिनको हुँदा सगरमाथा सफल आरोहण गर्नुभएको थियो । उहाँले आरोहण गरेको २९ वर्षपछि मात्रै अर्का आरोही तेम्बाछिरीले १६ वर्षको उमरेमा सगरमाथा आरोहण गरेर तामाङको रेकर्ड तोडेको थियो ।