रासस,काठमाडौं । राष्ट्रपति विद्यादेवी भण्डारीले खेलकुदले शारीरिक, मानसिक विकासमात्र नभई देश विकासमा टेवा पुग्ने भएकाले यस क्षेत्रलाई राज्यले विशेष ध्यान दिनुपर्ने बताउनुभएको छ । रोयल नेपाल गल्फमा शनिबार आयोजित खुला महिला गल्फ प्रतियोगिताको विजेता खेलाडीहरूलाई पुरस्कार प्रदान गर्दै राष्ट्रपति भण्डारीले भन्नुभयो, “हाम्रो देशको भौगोलिक बनोट अनुकूल मौसम भएकाले गल्फ खेलको विकासको ठूलो सम्भावना छ, त्यसैले यस खेलको प्रवद्र्धनबाट अन्तर्राष्ट्रिय खेलाडीलाई आर्कषक गरी खेल पर्यटनको विकास गर्न सहज हुनेछ ।”
उहाँले खेलकुदको विकासका लागि सरकारी तथा निजी क्षेत्रसम्बद्ध सबैले खेलक्षेत्रमा लगानी गर्न पर्याप्त ध्यान दिनुपर्नेमा जोड दिनुभयो । आज सम्पन्न एकदिने प्रतियोगितामा सुष्मा सिग्देलले महिला खुला गल्फ प्रतियोगिताको उपाधि जित्नुभयो । उपाधिसहित उहाँले एक थान स्कुटर, ५० हजार र विभिन्न गिफ्टहृयाम्पर प्राप्त गर्नुभयो ।
सोही विधाको उपविजेता भने कस्मिरा शाह हुनुभयो । उहाँले ३० हजारसहित विभिन्न गिफ्ट ह्याम्पर प्राप्त गर्नुभयो । प्रतियोगितामा सिनियरतर्फको उपाधि रेखा घिमिरेले जित्नुभयो भने उपविजेता कल्याणी मोक्तान हुनुभयो । सोही स्पर्धाको विजेताले ५० हजार पाउनुभयो भने उपविजेताले ३० हजार प्राप्त गर्नुभयो ।
महिलाको जुनियरतर्फ आइस्टिना तण्डन विजेता र सोनी तामाङ उपविजेता हुनुभयो । सो स्पर्धामा पहिलो हुनेले ३० हजार र दोस्रो हुनेले २० हजार प्राप्त गर्नुभयो । त्यस्तै कस्मीरा शाहले महिला बुस्ट ब्राइडस विधाको उपाधि जित्नुभयो भने महिला लङ्गेष्ट ड्राइभको उपाधि प्रतिभा राईले उचाल्नुभयो ।
एमेच्योर गल्फर प्रतिमा शेर्पा, आश्रिया बानु र सरिताश्री ज्ञवालीद्वारा आयोजित उक्त प्रतियोगितामा ३४ जना खेलाडीले भाग लिनुभएको थियो । नेपालकी नम्बर एक नेपाली महिला गल्फर प्रतिमा शेर्पाले यस किसिमको प्रतियोगिताले नेपाली महिलालाई राष्ट्रिय तथा अन्तर्राष्ट्रिय गल्फ प्रतियोगितामा सहभागी गराउन सजिलो होस् भन्ने उद्देश्यले प्रतियोगिताको आयोजना गरेको बताउनुभयो ।
